اسلام آباد ۔ 27 مارچ (اے پی پی) وزیر خارجہ مخدوم شاہ محمود قریشی دی زیر صدارت، وزارت خارجہ اچ کورونا وباءدے چیلنج نال نبڑنڑ دے حوالے نال اعلیٰ سطحی اجلاس منعقد تھئے ۔جمعے کوں اجلاس اچ باہرلے ملکاں اچ منتظر پاکستانیاں دی وختی وطن واپسی کوں ممکن بنڑاونڑ کیتے مختلف پہلواں دا جائزہ گھدا گیا ۔ وفاقی وزیرہوا بازی غلام سرور خان، وزیر اعظم دے معاون خصوصی صحت ڈاکٹر ظفر مرزا ،معاون خصوصی اورسیز پاکستانی سید ذوالفقار بخاری، معاون خصوصی نیشنل سیکورٹی ڈاکٹر معید یوسف،سیکرٹری خارجہ سہیل محمود، سیکرٹری ہوابازی ڈویژن حسن ناصر جامی، چیئرمین این ڈی ایم اے لیفٹیننٹ جنرل محمد افضل، ایگزیکٹو ڈائریکٹر این آئی ایچ جنرل عامر اکرام، سی ای او شوکت خانم ڈاکٹر فیصل سلطان اتے وزارت خارجہ دے سینئر حکام اجلاس اچ شرکت کیتی ۔ وزیر خارجہ شاہ محمود قریشی آکھیے جو وزیر اعظم عمران خان دی زیر صدارت نیشنل کوآرڈینیشن کمیٹی دے اجلاس اچ ایں اہم مسئلے تے تفصیلی مشاورت تھئی اے ۔انہاں آکھیے جوکورونا وائرس دی باہرلے ملکاں توں پاکستان ممکنہ آمد دے خطرے کوں روکنڑ کیتے نیشنل کوآرڈینیشن کمیٹی دے اجلاس اچ باہرلے ملک توں آونڑ آلی فلائٹس تے پابندی لاونڑ دا فیصلہ کیتا گے تے ایں دوران صورتحال دا جائزہ گھننڑ کیتے سب کمیٹی بنڑائی گئی اے ۔ایںویلھے بہوں سارے ملکاں اچ لاک ڈاون دی وجہ توں فلائٹس آپریشن معطل ہن۔ معاون خصوصی صحت ڈاکٹر ظفر مرزا پاکستان اچ کورونا عالمی وبا دے کھنڈنڑ دی نوعیت تے رسک اسسمنٹ دے حوالے نال اجلاس دے شرکت کوں بریفنگ ڈتی ۔ چیئرمین این ڈی ایم اے ایئرپورٹ تے مسافراں دے ٹیسٹ تے کوارنٹائین دی سہولت تے بیاں تیاریاں دے حوالے نال شرکا اجلاس کوں ڈسایا ۔ انہاں آکھیے جو ہک پاسے اساڈی استعداد کار اچ ودھارا تھیندا پئے لیکن ڈوجھے پاسوں متاثرہ لوکاں دی تعداد ودھدی پئی اے اساکوں ایں صورت حال کوں متوازن کرنڑاں ہوسی ۔ اجلاس اچ متفقہ طور تے سامنڑے آونڑ آلیاں تجویزاں کوں نیشنل کوآرڈینیشن کمیٹی دے اجلاس اچ منظوری کیتے پیش کیتا ویسی ۔
