اسلام آباد۔26جولائی (اے پی پی) وزیراعظم شہباز شریف آکھیا جو پچھلی حکومت دے دور اچ کنڑک دی منڳ اتے ذخائر کیتے جامع منصوبہ بندی نہ کرتے عوام نال ناانصافی کیتی ڳئی اے۔ پاکستان جیھے زرعی ملک اچ گزریل حکومت دے دور اچ غذائی بحران امدے رہین جو افسوسناک ہن۔ منگل کوں وزیراعظم آفس دے میڈیا ونگ توں جاری بیان موجب اے ڳالھیں انہاں آپݨی صدارت ملک اچ کنڑخ دے اڄوکے ذخائر، ممکنہ طلب اتے درآمد دے ٹینڈرز تے جائزہ اجلاس نال خطاب کریندیں ہوئیں آکھی۔ اجلاس اچ وفاقی وزراء مفتاح اسماعیل، سید نوید قمر، طارق بشیر چیمہ اتے متعلقہ اعلی حکام شرکت کیتی۔ وزیراعظم ہدایت کیتی جو کنڑک دی آندی فصل تئیں اجراء دے نال نال بفر سٹاک یقینی ٻݨایا ونڄے۔ کنڑک دی درآمد وچال معیار اتے مقدار کوں یقینی ٻݨاوݨ کیتے بین الاقوامی کنسلٹنٹ توں مدد ڳھدی ونڄے ۔ اجلاس کوں ݙسیا ڳیا جو ملک اچ اڄوکے کنڑک دی پیداور دا تخمینہ 26.389 ملین میٹرک ٹن لاتا ڳئے جیڑھا جو پچھلے سال 1.806 ملین میٹرک ٹن ذخائر موجود ہن۔ 30.79 ملین میٹرک ٹن دی مجموعی قومی طلب دے مقابلے کل ذخائر 28.199 ملین میٹرک ٹن ہن۔ طلب اتے ذخائر اچ فرق کوں ختم کرݨ کیتے حکومت اقتصادی رابطہ کمیٹی دے ذریعے ویلھے تے کنڑک دی درآمد دا فیصلہ کیتے۔ فیصلے دے مطابق پہلی کھیپ دے بعد ݙوجھے ٹینڈر اچ وزیرِ اعظم دی ہدایات دی روشنی اتے حکومتی کوششاں دے نتیجے اچ 300000 میٹرک ٹن تے فی میٹرک ٹن 34.54 ڈالر اتے مجموعی طور تے قومی خزانے دا 1 کروڑ 3 لکھ امریکی ڈالر بچایا ڳئے۔ اجلاس کوں ݙسیا ڳیا جو حکومت دے روس نال معاہدے دے تحت 20 لکھ میٹرک ٹن کنڑک درآمد دی پیشرفت جاری اے جیڑھی چھیکڑی مرحلے اچ اے۔ وزیراعظم خصوصی ہدایات جاری کیتی جو بفرسٹاک متعین کر تے جلدی ایں تے رپورٹ پیش کیتی ونڄے۔ وزیرِ اعظم وزراتِ تجارت، وزارتِ فوڈ سکیورٹی اتے ساری متعلقہ وزارتاں اتے حکام دی ٹینڈر اچ فی ٹن لاگت اچ ڳھٹکی کیتے کوششاں دی تعریف کیتی۔
.jpg)
