راولپنڈی۔10مئی (اے پی پی) پاک فوج دے شعبہ تعلقات عامہ(آئی ایس پی آر) آکھیا جو نو مئی دا ݙینھ سیاہ باب دے طور یاد رکھیا ویسی ، جیڑھا کم ملک دے ابدی دشمن 75 سالیں اچ نہ کر سڳیے او اقتدار دی ہوس اچ ہک سیاسی لبادہ پاتے گرہ کر ݙتے، پارٹی دی کجھ شرپسند لیڈرشپ دے حکم اتے پیشگی منصوبہ بندی ہئی اتے ھے۔ اے گھناؤنی سازش ہئی جو پاک فوج اپݨا فوری ردعمل ݙیوے جئیں کوں سیاسی مقاصد کیتے استعمال کیتا ونڄ سڳے پر پاک فوج دے ذمہ دارانہ ردعمل ایں سازش کوں ناکام ٻݨا ݙتے۔ کہیں کوں وی عوام کوں اکساوݨ اتے قانون ہتھ اچ ڳھنݨ دی موکل نی ݙتی ونڄ سڳدی، بلوائیاں دے خلاف سخت کاروائی کیتی ویسی۔ آئی ایس پی آر توں جاری بیان اچ آکھیا ڳیا جو چیئرمین پی ٹی آئی کوں نیب دے علامیہ دے مطابق کل اسلام آباد ہائیکورٹ توں قانون دے مطابق گرفتار کیتا ڳے۔ چیئرمین پی ٹی آئی دی گرفتاری دے فوراً بعد ہک منظم طریقے نال آرمی دی املاک اتے تنصیبات تے حملے کرائے ڳے اتے فوج مخالف نعرے بازی کرائی ڳی۔ ہک ہاسے تاں اے شرپسند عناصر عوامی جذبات کوں اپݨے محدود اتے خودغرض مقاصد کیتے ابھار ݙیندن اتے ݙوجھے پاسوں لوکاں دی اکھیں اچ دھول پیندیں ہوئیں ملک کیتے فوج دی اہمیت کوں وی اجاگر کریندن جیڑھا جو دوغلے پن دی انتہا اے۔ بیان اچ آکھیا ڳیا جو فوج ٻہوں تحمل، بردباری ݙکھائی اے اتے اپݨی ساکھ دی پرواہ نہ کریندیں ہوئیں ملک دے فائدے کیتے صبر اتے برداشت توں کم ڳھدے۔ مذموم منصوبہ بندی دےتحت پیدا کیتی ڳی ایں صورتحال نال اے گھناؤنی کوشش کیتی ڳی جو آرمی اپݨا فوری رد عمل ݙیوے جئیں کوں اپݨے سیاسی مقاصد کیتے استعمال کیتا ونڄے۔ آرمی دے میچور رسپانس ایں سازش کوں ناکام ٻݨائے۔ اساکوں پتہ اے جو ایندے پچھوں پارٹی دے کجھ شرپسند لیڈر شپ دے احکامات، ہدایات اتے پوری پیشگی منصوبہ بندی ہئی اتے ھے۔ جیڑھے سہولت اکر، منصوبہ ساز اتے سیاسی بلوائی انہاں کاروائیاں اچ ملوث ہن انہاں دی سنجاݨ کر ڳھدی ڳی اے اتے انہاں دے خلاف سخت کاروائی کیتی ویسی۔
.jpg)
